وزیراعظم شہباز شریف دا اقوام متحدہ دیاں قرارداداں تے عمل نا تھیوݨ تے چنتا، غزہ اتے کشمیر اچ مظالم روکݨ دا مطالبہ، یواین چارٹر دے مطابق ڄڳ نال رل تے کم کرݨ دا عزم، اقوام متحدہ دی جنرل اسمبلی دے 79 ویں اجلاس نال خطاب


Prime Minister Muhammad Shehbaz Sharif addressing the 79th Session of United Nations General Assembly in New York on 27 September 2024.

 

نیویارک۔27ستمبر(اے پی پی)وزیراعظم محمد شہبازشریف آکھیے جو اقوام متحدہ دیاں قرارداداں تے عملدرآمد نا تھیوݨ مشرق وسطیٰ کوں خطرے اچ سٹ ݙتے، غزہ اچ خونریزی تے چپ نئیں ریہا ونڄ سڳدا، مظالم روکݨے ہوسن، فلسطین کوں اقوام متحدہ دا مستقل رکن منیا ونڄے، کشمیریاں کوں وی بھارتی مظالم توں نجات ݙیوا تے حق خود ارادیت ݙیوݨا ہوسی، پاکستان اقوام متحدہ دے آصولاں دے مطابق ڄڳ نال رل تے کم کرݨ کوں ہر ویلھے تیار اے۔ وزیراعظم شہباز شریف اقوام متحدہ دی جنرل اسمبلی دے 79 ویں اجلاس نال خطاب کیتے اتے اپݨا خطاب تلاوت قرآن پاک نال کیتے۔ وزیراعظم اپݨے خطاب اچ کشمیر اتے فلسطین تنازعات، یوکرین دی جنگ، موسمیاتی تبدیلی دے مسئلے، ودھدی غربت اتے قرضیاں دے ٻھار سودھا کئی علاقائی و بین الاقوامی مسائل تے الائے۔ وزیراعظم جنرل اسمبلی دے صدر کوں انتخاب تے مبارک ݙتی اتے اپݨے جنرل اسمبلی نال ݙوڄھی واری خطاب کوں اعزاز قرار ݙیندے آکھیے جو ساݙے بانی قائدِ اعظم محمد علی جناح 1947 اچ اعلان کیتا ھا جو ” اساں اقوام متحدہ دے منشور نال کھڑے ہیں اتے ڄڳ دے امن و خوشحالی کیتے اپݨیاں مکمل خدمات ݙیسوں ” پاکستان ایں عزم کوں ہمیشہ برقرار رکھیے۔انہاں آکھیے جو اڄوکے حالات اچ ڄڳ دے نظام کوں کئی وݙے چیلنجز ہین، غزہ اچ اسرائیل دی نسل کشی دی جنگ، یوکرین اچ خطرناک تنازعہ، افریقہ و ایشیا اچ تباہ کن تنازعات؛ ودھدی جغرافیائی سیاسی کشیدگیاں، ولا اٻھردی دہشت گردی اتے اڳو تے ودھدی غربت، قرضیں دی دلدل اتے موسمیاتی تبدیلی دے ودھدے اثرات سامݨے کھڑن، ساکوں یک نویں سرد جنگ کھنݙدی ݙسدی اے۔ انہاں چیلنجاں دے ولدے اچ یو این سیکرٹری جنرل مستقبل دی کانفرنس دا مطالبہ کیتے ڄئیں پاروں مستقبل دے معاہدے اچ ترقی، امن و سلامتی، ٹیکنالوجی و عالمی حکمرانی تے 54 اقدامات منظور کیتے گئن۔ میں اڄ پاکستان دے عوام دا غزہ تے ݙکھ ݙساوݨ آیاں جو ساݙے دل رتو رت ہین، اساں مقدس سرزمین تے تھیوݨ آلے المیے کوں ساھندے پئے ہیں ڄیڑھا انسانیت دے ضمیر اتے ایں ادارے دی بنیاد ہلا ݙیندے، اساں ایندے تے کیویں چپ رہ سڳدوں جو ٻال اپݨے تباہ شدہ گھراں دے ملبے ہیٹھ دٻیے ہوئن؟ اساں ٻالاں دے بے جان لاشے جھولی اچٌ چاتیاں ماواں دا ݙکھ ان ݙٹھا کر سڳدے ہیں؟ اے صرف ہک تنازعہ نئیں، اے معصوم لوکاں دا منظم قتل عام اے، انسانی زندگی اتے وقار تے حملہ اے، غزہ دے ٻالاں دا خون صرف ظالماں دے ہتھ داغدار نئیں کریندا ٻھل ایں تنازعے کوں ودھارا ݙیوݨ آلیاں دے ہتھ وی ان خون اچ رنگیے ہوئن۔ وزیر اعظم آکھیا ڄیکر اساں اے نا مکݨ آلے مظالم ان ݙٹھے کروں تاں اپݨی انسانیت کوں ھیݨا کرݙیسوں، ہݨ صرف مذمت کرݨ ٻہوں نئیں، ہݨ عمل دا ویلھا اے جو اساں اے خونریزی مکاوݨ دا مطالبہ کروں، غزہ تے اسرائیل دی جارحیت جاری اے جیندی مذمت کریندے ہیں، غزہ دے المناک سانحے انسانیت کوں ہلا تے رکھ ݙتے، معصوم ٻالاں، تریمتیں، اتے ہتھو خالی شہریاں دے قتل تے چپ نئیں ریہا ونڄ سڳدا، نہتے فلسطینیاں دی رت نا ونڄیسی۔ وزیر اعظم آکھیے جو عالمی برادری کوں  پائیدار امن اتے ݙو ریاستی حل کیتے اڳو آوݨا ہوسی، ساݙا مطالبہ اے جو فلسطین کوں اقوام متحدہ دا مستقل رکن منیا ونڄے، فلسطینی ریاست قائم کیتی ونڄے جیندا دارالحکومت بیت المقدس ہووے۔ انہاں آکھیا جو کڄھ ݙینھ اچ لبنان تے اسرائیلی بمباری نال تریمتیں اتے چھوٹے ٻالاں سودھا 500 توں ودھ لوک موئن، اقوام متحدہ دی قرارداداں تے عملدرآمد اچ ناکامی اسرائیل دا حوصلہ ودھدیندی اے، اے پورے مشرق وسطیٰ کوں ہک جنگ اچ سٹݨ دا خطرہ اے جیندے نتائج عالمی سطح تے سنگین اتے سوچ توں وی ودھ تھی سڳدن۔ وزیر اعظم آکھیا جو فلسطین دے عوام آلی کار جموں و کشمیر دے لوک وی اپݨی آزادی و حق خودارادیت کیتے ہک صدی توں جدوجہد کریندے پن، امن دو ودھݨ دی بجائے بھارت جموں و کشمیر تے سلامتی کونسل دیاں قرارداداں تے عملدرآمد دے وعدیاں توں انکاری اے، وں اے قرارداداں جموں و کشمیر دے عوام کوں اپݨے بنیادی حق خود ارادیت کیتے استصواب رائے دا اختیار ݙیندن، 5 اگست 2019 دے بعد توں بھارت جموں و کشمیر کیتے بدقسمتی نال انہاں دے رہنماواں دے بقول “حتمی حل” مسلط کرݨ کیتے یکطرفہ غیر قانونی اقدامات شروع کیتے ہوئن، 9 لکھ بھارتی فوجی مقبوضہ جموں و کشمیر دے لوکاں کوں وݙے کرفیو، ماورائے عدالت قتل اتے ہزاراں نوجوان کشمیریاں دے اغوا ڄھیں خوفناک اقدامات توں ݙریندن، او ہک آبادکار نوآبادیاتی منصوبے دے تحت بھارت کشمیریاں دی زمیناں اتے جائیداداں تے قبضہ کریندا پئے اتے ٻاھرو دے لوکاں کوں مقبوضہ جموں و کشمیر اچ آباد کریندا پئے جو مسلم اکثریت کوں اقلیت اچ وٹیڄے ٻھل او ایں حربے اچ وی ناکام رہسی۔ وزیراعظم آکھیا جو کشمیری عوام ایں غلط ہندوستانی سنڄاݨ کوں مسترد کریندن ڄیڑھی نئی دہلی انہاں تے تھپݨ چاہندے، مقبوضہ کشمیر اچ بھارت دی وحشیانہ جبر و استبداد دی پالیسی برہان وانی دی میراث کوں لکھاں کشمیریاں دی جدوجہد اتے قربانیاں کوں تحرک ݙیندی رہسی، او اپݨی جائز اتے بے مثال جدوجہد نال بے خوف تھی تے اڳو تے ودھدے پن۔ وزیر اعظم آکھیا جو چنتے دی ڳالھ اے جو بھارت اپݨی عسکری صلاحیتاں اچ وݙے پیمانے تے توسیع اچ ردھا ہوئے ڄیڑھی دراصل پاکستان دے خلاف صف آرائی اے، ایںدے جنگی نظریے، ہک اچانک حملے اتے “جوہری پھیلائو دے تحت محدود جنگ” دے تصور آلے ہین، ہندوستان بغیر سوچے سمجھے پاکستان دی ہک باہمی “سٹرٹیجک ریسٹرینٹ رجیم” دی تجاویز دا مثبت ولدا نئیں ݙتا، ایندی قیادت اکثر لائن آف کنٹرول پار کرݨ اتے آزاد کشمیر تے ” قبضہ” کرݨ دی دھمکی ݙتی اے۔ وزیراعظم واضح کیتے جو پاکستان کہیں وی بھارتی جارحیت دا پوری صلاحیت نال فیصلہ کن ولدا ݙیسی، پائیدار امن کیتے بھارت کوں 5 اگست 2019 دے بعد دے اپݨے یکطرفہ اتے غیر قانونی اقدامات ولا ڳھݨݨے ہوسن، اقوام متحدہ دی سلامتی کونسل دی قرارداداں اتے کشمیری عوام دی خواہشات دے مطابق جموں و کشمیر تنازعہ دے پرامن حل کیتے الاوݨا چاہیدے، مقبوضہ جموں و کشمیر اتے فلسطین اچ قتل و غارت گری اتے ناجائز قبضہ ہر روز ہک نویں جہنم کوں ابھریندے، تنازعات دے علاوہ 21 ویں صدی بحراناں دا ہک سلسلہ ڳھن تے آئی اے جیندے اچ ترقی دا پلٹݨ اتے موسمیاتی تبدیلی دے ودھدے اثرات شامل ہین۔ انہاں آکھیا جو ݙو سال پہلے پاکستان ہولناک سیلاب نال متاثر تھئے جیندے نال 30 ارب ڈالر دے نقصانات تھئین، ہم ہر سال گرمی اچ شدت نال نویں موسمیاتی اثرات پوسن، پاکستان عالمی سطح تے ہک فیصد توں وی ڳھٹ کاربن دا اخراج کریندے ول وی اساں اپݨی غلطی نہ ہووݨ دا وݙا مل چکائے، اے عالمی انصاف دے کہیں وی حساب کتاب اچ غیر منصفانہ اے، ساکوں مسلمہ اصول قائم رکھݨا چاہیدے، پاکستان ایس ڈی جیز اتے موسمیاتی اہداف دی کامیابیاں دی حمایت کیتے اپݨے ترقی یافتہ ملک دے شراکت داراں دے وعدیاں دی تکمیل چاہندے جیندے اچ موسمیاتی فنانس اچ سالانہ 100 ارب ڈالر توں ودھ دا نواں سالانہ ہدف وی شامل اے۔ شہباز شریف قرضیاں اتے لیکویڈیٹی دی پریشانی دے منحوس دائرے کوں “قرض دے ڄال” دے بجائے “موت دا ڄال” قرار ݙیندے آکھیے جو ایندے اچ پھسیے تقریباً 100 ترقی پذیر ممالک نال ایس ڈی جیز حاصل کرݨ ہک سراب اے، بین الاقوامی مالیاتی ڈھانچہ ڄیکوں سیکرٹری جنرل “اخلاقی طور تے ݙیوالہ” آکھیے اتے عالمی تجارت و ٹیکنالوجی دے نظام  دی اصلاح  اتے ترقی و عالمی مساوات ودھاوݨ کیتے مطابقت رکھݨا چاہیدے۔ وزیر اعظم آکھیا جو ایں سال مارچ اچ عہدہ سنبھالݨ دے بعد اپݨے ملک دے 24 کروڑ عوام دی بھلائی و خوشحالی تے توجہ رہی اے، اساں اوکھے فیصلے کیتن جئیں ساݙی معشیت کوں ݙھاݨ توں بچائے، میکرو اکنامک استحکام بحال کیتے، مالیاتی خسارے تے قابو پاتے، اپݨے ذخائر تکڑے کیتن جیندے نال مہنگائی سنگل ڈیجٹ تے آگئی اے۔ انہاں آکھیا جو جنوبی و وسطی ایشیا اتے مشرق وسطیٰ دے مرکز اچ اساں اپݨے لوکاں کیتے ہکو سویں نتائج سانڳے جغرافیائی معاشی و علاقائی رابطے ودھائن، شاندار چین پاکستان اقتصادی راہداری (سی پیک) دا ݙوڄھا مرحلہ کامیابی نال شروع اے، خصوصی سرمایہ کاری سہولت کونسل (ایس آئی ایف سی) نال اساں مستحکم انفراسٹرکچر، قابل تجدید توانائی، معدنیات، پائیدار زراعت اتے ٹیکنالوجی اچ سرمایہ کاری متحرک کریندے پئے ہیں، اے ترقی اتے جدیدیت دے ہک نویںد ور دی شروعات ہوسی۔ شہباز شریف آکھیے جو ݙو ݙھاکیاں توں پاکستان دہشت گردی دا کامیابی نال مقابلہ کیتے اتے دہشتگرد گروہاں کوں شکست ݙتی اے اتے دہشت گردی دے خلاف جنگ اچ ودھ ملھ چکائے، ساݙے 80 ہزار  بہادر فوجی اتے عام شہری شہید تھئین، جیندے اچ سکولاں دے ٻال وی ہین، اے پی ایس دیاں ہولناک یاداں حالی تازہ ہین، ساݙی معیشت کوں 150 ارب ڈالر دا نقصان تھئے۔ انہاں آکھیا جو بدقسمتی اڄ ساکوں ولو خاص کرٹی ٹی پی/ فتنہ الخوارج اتے ایندے کارندیاں ولوں بیرونی مالی اعانت اتے سرپرستی آلی دہشت گردی دی نویں لہر دا سامݨا اے،  اساں اپݨی جامع قومی کاوش”عزم استحکام” نال ہک واری ول اے خطرہ مکاوݨ کیتے پرعزم ہیں اتے عالمی برادری نال رل تے ہر قسم دی  دہشت گردی دا مقابلہ کریسوں اتے انسداد دہشت گردی دے عالمی ڈھانچے اچ اصلاحات ڳھن آسوں۔ انہاں آکھیے جو پاکستان افغانستان اچ تیکھے حالات اچ معمول تے چاہندے اتے لکھاں مصیبت ماریے افغاناں کیتے اقوام متحدہ دی 3 ارب ڈالر دی انسانی امداد کیتے اپیل اچ نال ہیں، اساں انہاں بین الاقوامی توقعات اچ شراکت دار ہوندے ایندی توثیق  کریندے ہیں جو افغان عبوری حکومت تریمتیں اتے چھوہریں دے حقوق، سیاسی شمولیت دے ودھارے سودھا انسانی حقوق دا احترام کریسی، خاص کر افغان عبوری حکومت کوں افغانستان اچ سارے دہشت گرد گروہاں خصوصی طور تے ہمسایہ ملکاں دے خلاف سرحد پار دہشت گردی دے ذمہ داراں کوں بے اثر کرݨ کیتے موثر کارروائی کرݨی چاہیدی اے، انہاں اچ داعش، القاعدہ نال جڑیے ٹی ٹی پی/ فتنہ الخوارج ، مجید بریگیڈ اتے بی ایل ے اتے ٻئے گروپ شامل ہین۔ وزیر اعظم آکھیا جو ہک بیا وݙے چنتے آلا عالمی مسئلہ اسلامو فوبیا ودھݨ اے ڄیڑھا ہݨ قرآن پاک دی بے حرمتی، مساجد تے حملے، مسلماناں بارے منفی تصورات اتے انہاں دے خلاف وانڄھ اتے تشدد ظاہر کریندے، اسلامو فوبیا دا سب توں خطرناک مظہر ہندوستان اچ ہندو بالادستی دا ایجنڈا اے،  اے جارحانہ انداز اچ 20 کروڑ مسلماناں کوں محکوم ٻݨاوݨ اتے ہندوستان دے اسلامی ورثے کوں مکاوݨ دی کوشش اے، پاکستان اتے او آئی سی، اقوام متحدہ دے سیکرٹری جنرل اتے انہاں دے خصوصی ایلچی نال رل تے اسلامو فوبیا نال نمٹݨ کیتے حکمت عملی تے کم کریسوں، پاکستان یوکرین اچ المناک تنازعہ کوں مکاوݨ اتے اقوام متحدہ دے چارٹر اتے بین الاقوامی معاہدیاں دے مطابق ایندا پرامن چاہندے۔ انہاں آکھیا جو پاکستان دی افریقی ملکاں نال یکجہتی، دوستی اتے تعاون دی ہک لمبی تاریخ اے، اساں دہشت گردی دا مقابلہ کرݨ اتے علاقائی تنازعات حل کرݨ کیتے افریقہ اچ اقوام متحدہ دے قیام امن کیتے اپݨے کردار سودھا انہاں نال تعاون جاری رکھسوں۔ وزیر اعظم آکھیا جو ساکون اپݨے نال اپݨے لوکاں کیتے اے سنیہا ڳھن ونڄݨا چاہیدے جو او کمزور بے آواز نئیں، مظلوم کوں امید نئیں چھوڑݨی چاہیدی، غربت پہلے توں مقدر نئیں اتے ساݙی دھرتی تے انصاف اتے برابری دے خدائی احکام دی پاسداری کیتی ونڄے۔

متعلقہ مضامین