لاہور۔12فروری (اے پی پی):وزیراعظم عمران خان آکھیے جو عوام کوں صحت دیاں معیاری تے سستیاں سہولتاں اتے سماجی تحفظ ݙیوݨ موجودہ حکومت دی اولین ترجیح اے، ، ہیلتھ کارڈ دی بدولت نہ صرف عام بندے کوں صحت دے حوالے نال تحفظ ملسی بلکہ نظام صحت اچ وی انقلابی تبدیلی آسی ۔اے ڳالھ انہاں جمعے کوں صوبہ پنجاب اچ یونیورسل ہیلتھ انشورنس دی فراہمی دے حوالے نال پیشرفت تے جائزہ اجلاس دی صدارت کریندے ہوئیں آکھی اے ۔اجلاس اچ وزیر اعلیٰ پنجاب سردار عثمان بزدار، وزیر اقتصادی امور مخدوم خسرو بختیار، مشیر وزیراعظم شہزاد اکبر، معاون خصوصی ملک امین اسلم، صوبائی وزیر خزانہ پنجاب مخدوم ہاشم جواں بخت، معاون خصوصی وزیر اعلی پنجاب ڈاکٹر فردوس عاشق اعوان اتے سینئر افسراں شرکت کیتی ۔ اجلاس اچ پنجاب دی صوبائی کابینہ ولوں صوبے دی 100 فیصد آبادی کوں ایں سال دے چھیکڑ تئیں تک یونیورسل ہیلتھ کوریج ݙیوݨ دی منظوری دے بعد ہݨ تئیں دی پیشرفت دے حوالے نال ݙسایا ڳیا ۔صحت سہولت پروگرام دی فزیبلٹی، بجٹ دے تخمینے، اتے مرحلہ وار عملدرآمد تے شرکاء کوں تفصیلی بریفنگ ݙیندے ہوئیں ݙسایا ڳے جو گھٹ مدت دے پلان دے تحت موجودہ مالی سال دے چھیکڑ تئیں ساہیوال اتے ڈیرہ غازی خان ڈویژن دے 7 ضلعیں اچ ہیلتھ کارڈز ݙتے ویسن جݙاں جو دسمبر 2021 تئیں پنجاب دی 100 فیصد آبادی کوں یونیورسل ہیلتھ انشورنس دے تحت ہیلتھ کارڈ دے ذریعے علاج معالجے دیاں بہتر سہولتاں مل ویسن ۔وزیراعظم عمران خان اجلاس توں خطاب کریندے ہوئیں ماضی اچ صحت اتے تعلیم دے شعبیں کوں نظر انداز کیتا ڳئے جیں دی وجہ توں صحت دا نظام غیر موثر تھی ڳئے ۔
