تحریر۔ سجاد حیدر
ترجمہ :ڈاکٹر سعدیہ کمال
خیبر پختونخوا ݙاہ سال توں ودھ عرصے تئیں دہشت گردی دی لہر دے اثر وچ رہیے۔ اے او عرصہ ہئی جݙاں اتھاں دے لوک آپݨے مستقبل دے حوالے نال شدید مایوسی اتے بے یقینی دا شکار ہن۔ٹارگٹ کلنگ، بم دھماکیں ،خودکش حملیں اتے دہشت گردی دے ٻئے واقعات دی بہتات ذہناں کوں نفسیاتی طور تے ایں متاثر کر رکھیا ہئی جو ہر سویل کم کار تے ملازمتاں کیتے گھراں توں نکلݨ آلے شام کوں گھر واپسی دی امید تئیں ونڄا بیٹھے ہن ۔ اے او عرصہ ہئی جݙاں کوئی وی سوچ وی نہ سڳدا ہئی جو خیبر پختونخوا اچ زندگی معمول دے پاسے آسی اتے اتھاں دے لوک ول سکون تے اطمینان نال کھل ہس دی کیفیات دے مزے گھنسن ، اے اللہ دا خصوصی فضل و کرم اتے پاکستان دی سیکورٹی فورسز دی عوام دے تعاون توں دہشت گردی دے خلاف جنگ اچ کامیابیاں دا ثمر اے جو اہل وطن اتے خیبر پختونخوا دے عوام کوں نہ صرف دہشت گرداں دے وجود تے انہاں دی پیدا کیتی ڳئی مایوسانہ کیفیات توں نجات ملی بلکہ انہاں دیاں زندگیاں اچ رونقاں،تے سیر و تفریح دے موقع وی ول آندے پئن ۔
پورے پاکستان خاص طور تے خیبر پختونخوا کوں قدرت جنہاں حسین و دلکش سیاحتی جہیں توں نوازیے انہاں دی ہک دنیا معترف اے ۔ھک لمبے عرصے توں اے لوڑھ محسوس کیتی ویندی اے جو انہاں سیاحتی جہیں کوں پورے ملک تے پوری دنیا دے سیر و سیاحت دا شوق رکھݨ آلے لوکاں کیتے سیاحتی اتے تفریحی نکتہ نگاہ توں ترقی ݙتی ونڄے ۔ایں تناظر اچ انہاں جہیں تئیں رسائی اتے قیام و طعام سودھے ٻئے سارے متعلقہ حوالیں نال سہولتاں کوں ودھ توں ودھ بہتر بݨاوݨ ناگزیر قرار ݙتا ویندا پئے ۔موجودہ حکومت دے تقریبا ݙھائی سالہ دور وچ ایندے توں پہلے خیبر پختونخوا اچ پی ٹی آئی دی صوبائی حکومت دے پنج سالہ دور اچ جیویں جیویں ملک اچ امن و امان دی صورت حال بہتر تھئی اے سیاحتی جہیں دی ترقی اتے انہاں جہیں تے سیرو تفریح دے ودھ توں ودھ موقع دی فراہمی تے خصوصی توجہ ݙتی ڳئی اے ۔انہاں حکومتی کوششاں دا نتیجہ اے جو پورے ملک بشمول صوبہ خیبر پختونخوا دیاں سیاحتی ڄہیں تے سال دے کجھ ݙینھاں اچ ملکی تے غیر ملکی سیاحواں دی آمد اچ مسلسل ودھارا تھیندا پئے تے او جہیں جنہاں ولوں سیاح عموما موسم انھالے اچ اتھاں رخ کریندے ہن تے پالے اچ سیاحتی سرگرمیاں گھٹ نظر آندیاں ہن تے پالے دے موسم اچ وی رونق اتے آباد ݙکھائی ݙیندن
اڄوکے موسم پالے اچ وی خیبر پختونخوا دیاں مختلف سیاحتی جہیں جیندے اچ کالام ، گلیات ،کاغان ، ناران اتے مالم جبہ اچ سیاحواں دی آمد تعداد دی تعداد ودھ ڳئی اے جیں پاروں نہ صرف انہاں علاقیں دے عام لوکاں تے کاروباری حضرات دے دل خوش تھئن بلکہ اے صورتحال پورے صوبے اتے ملک دی اجتماعی اقتصادی، معاشی اتے معاشرتی صورتحال تے وی ٻہوں چنڳے اثرات پیندی اے ۔
اڄوکے ماسم پالے اچ خیبر پختونخوا دیاں انہاں سیاحتی جہیں تے جنہاں دی دل کوں بھاوݨ آلی برف باری دے بعدمزید نکھر ویندی اے ملکی و غیر ملکی سیاحواں دے دل کوں بھاوݨ تے تفریح کیتے ٻہوں سارے خصوصی اقدامات چاتے ڳئن،”سنو فیسٹولز ” دے ناں توں سرمائی کھیݙاں دے مقابلیں کوں ساریں توں ودھ زیادہ پذیرائی ملی۔ انہاں خصوصی سنو فیسٹولز دا انعقاد خیبر پختونخوا اتے گلگت بلتستان دے کئی تفریحی جہیں دی شان و شوکت ودھاوݨ دا باعث بݨیا ۔ خیبر پختونخوا اچ گلیات اتے مالم جبہ دیاں جہیں تے منعقدہ سنو فیسٹولزہک نویں تاریخ رقم کیتی ۔انہاں فیسٹولزاچ شرکت کرݨ آلے لوکاں جنہاں ناقابل فراموش احساسات و جذبات اتے ناقابل بیان خوش کن کیفیات دے زیر اثرگھراں اچ واپس آڳئن او انھاں کوں ول ول اتھاں ڳھن آوݨ کوں دلکریندے تاں ݙوجھے پاسے انہاں کوں اپݨے حلقہ اثر اچ ایندے توں اڳوں ودھ تے مذکورہ جہیں دی تشہیر تے وی مجبوری کریندی پئی اے ۔
جتھاں تئیں مالم جبہ سنو فیسٹول اا تعلق اے اے رنگا رنگ میلہ ھک ہفتے توں ودھ تئیں اپݨا رنگ جماوݨ دے بعد مک ڳیا،ایں میلے اچ موسم پالے دے مختلف کھیݙاں دے مقابلے وی تھئے جنہان اچ اسکیئنگ، سنو بورڈنگ، آئس ہاکی وغیرہ شامل ہن جݙاں جو روایتی اتے مقامی پکواناں اتے دستکاری دیاں نمائشاں تے ٻیاں سرگرمیاں وی میلے دا حصہ ہن ، ایں دوران 22توں 24جنوری انٹرنیشنل سنو بورڈنگ ٹورنامنٹ منعقد تھیا ،ایونٹ اچ یورپ، بیلجیئم،افغانستان اتے پاکستان دے کھلاڑی شریک تھئے ۔محکمہ سیاحت خیبرپختونخوا دے زیرانتظام خیبرپختونخوا کلچر اینڈ ٹورازم اتھارٹی اتے سیمسن گروپ آف کمپنی دی سانجھ نال منعقد تھیوݨ آلے پاکستان انٹرنیشنل سنوبورڈنگ کپ دے نال نال فوڈ اینڈ میوزک فیسٹیول وی رکھیا ڳیا ہئی جیں توں نہ صرف کھلاڑی بلکہ حسین وادی دا رخ کرݨ آلے ہزاراں سیاح وی مزے ڳھدے۔ایں دوران گلگت بلتستان توں آوݨ آلی یوگا ٹرینر ماہ گل کبیر مالم جبہ دی جاہ تے خصوصی یوگا ٹریننگ سیشن دا وی انعقاد کیتا جݙاں جو محفل موسیقی وی ایں دوران آپ دا رنگ ڄمیندن
چھیکڑی تقریب دے موقع تے سینیٹر فیصل جاوید مہمان خصوصی ہن انہاں دے رلے محکمہ سیاحت خیبرپختونخوا اتے سیمسن گروپ آف کمپنی دے عہدیداران وی موجود ہن ۔ پاکستان انٹرنیشنل سنو بورڈنگ کپ دے دوران تریمتاں دے جائنٹ سلام مقابلیں اچ پاکستان دی فاطمہ ندیم 3 منٹ 42 سیکنڈ دے ویلھے دے نال پہلی پوزیشن ڳھدی جݙاں جو سارا ندیم ݙوہیں رن دے مشترکہ ویلھے مطابق 4 منٹ 07 سیکنڈ دے نال ݙوجھی تے پاکستان ہی دی عائشہ اکمل 4 منٹ 51 سیکنڈ دے ویلھے نال تریجھی پوزیشن ڳھدی ۔ ایونٹ اچ 8تریمتاں دا تعلق جنہاں اچوں ترائے تریمتاں دا تعلق افغانستان توں اے وی حصہ ڳھدا ۔مرداں دے انٹرنیشنل سنو بورڈنگ دے جائنٹ سلام مقابلیں اچ بلجیئم دے وکٹر روجر 1 منٹ 36 سیکنڈ دے نال پہلی، بلجیئم ہی دے جولین 1 منٹ39 سیکنڈ دے ݙوجھی تے بلجیئم ہی دے ہیری 1 منٹ41سیکنڈ دے نال تریجھی پوزیشن ڳھدی۔ انہاں جائنٹ سلام متوازی مقابلیں اچ پاکستان دے رضا اللہ گولڈ، افغانستان دے احمد سروش سلور جݙاں جو پاکستان دے وکیل احمد برانز میڈل حاصل کیتا جݙاں جو تریمتاں دے انہاں متوازی مقابلیں اچ سارا ندیم گولڈ، فاطمہ ندیم سلور اتے عائشہ اکمل سلور میڈل حاصل کیتے۔
انہاں دنیا کوں اے پیغام ݙتے جو پاکستان اتے ایندا صوبہ خیبر پختونخوا ہݨ ہک پر امن علاقہ اے جتھاں پوری دنیا دے سیاحواں دی تفریح طبع کیتے ٻہوں کجھ موجود اے لہذا سیاحت تے سیر و تفریح دا شوق رکھݨ آلیں کوں تھاں ضرور آوݨاں چاہیدے ۔
ایں حوالے نال خیبر پختونخوا ٹورازم اتھارٹی دے سربراہ جنید خان آکھیے جو صوبے دی مشہور سیاحتی وادیاں تے قدیم تہذیبی جہیں دے پاسے ودھ توں ودھ سیاحواں کوں راغب کرݨ دے حوالے نال کم تکھے اڳوں تے ودھدا پئے، انھاں آکھیے جو مالم جبہ پاکستان اچ بہترین ریزارٹ اے ۔انھاں ݙسایا جو اتھاں اسکیئنگ مقابلیں دے نال نال ، 15 سال توں گھٹ عمر دے ٻالاں کیتے الپائن اسکیئنگ اتے اسکیٹنگ دے مقابلے، کرلنگ وغیرہ دے مقابلے وی سنو فیسٹول دا حصہ ہن، انھاں آکھیے جو اے فیسٹیول دنیا کوں ہک مثبت پیغام بھیجیسی جو پاکستان تے خیبر پختونخوا اچ امن بحال تھی ڳئے ایں طرح مالاکنڈ اتے ہزارہ سودھے خیبر پختونخوا دے ٻئے حصیں اچ سیاحتی سرگرمیاں زور پکڑیسن ، انہاں مزید آکھیے جو سوہݨیاں جہیں دی ترقی کیتے ودھ ساریاں کوششاں کیتیاں ویندیاں پئن ، صوبے اچ قدرتی مناظر اتے شاندار منظرنامیں دی بہتات اے نال ہی اتھاں معدنیات، زرعی ذخائر اتے ٻئے وسائل وی ودھ سارے ہن جݙاں جو قدرتی مٹھے پاݨی دے چشمے، جھیلاں، آبشاراں، اچے برف آلے پہاڑ ، ساویاں چرݨ دیاں جہیں ، وادیاں، اتے ٻئے نظارے ایں خطے دا خاصہ ہن ۔ انہاں آکھیے جو ٹورازم اتھارٹی دے اہم کردار غیر ملکی اتے ملکی و مقامی سیاحواں کوں خیبر پختونخوا دیاں سیاحتی جہیں دے پاسے راغب کرݨ اچ اہم کامیابی حاصل کیتی اے ۔اتھارٹی ولوں وادی سوات، مالم جبہ ایندی ریزارٹ، کالام، گلیات، کمراٹ اتے ٻیاں جہیں تے تسلسل دے نال ایجھیاں سرگرمیاں دا انعقاد کیتا ویندا پئے جیڑھا جو سیاحواں کیتے پر کشش ہووے تے انہاں اقدامات دے نتیجے اچ ہر سال سیاحواں دی تعداد اچ ودھارا تھیندا پئے ۔
گلیات ڈویلپمنٹ اتھارٹی ولوں منعقد تھیوݨ آلے ترائے ݙینھ وار سنو فیسٹیول توں گلیات دی سیاحت کوں مزید ودھارا تھئے ، 20 ہزار توں ودھ سیاحواں دی نتھیاگلی اتے ایوبیہ اچ آمد نال ہوٹل انڈسٹری اتے ٻئے کاروباری حلقیں کوں روزگار دے نویں مواقع ملیے، وزیر اعلی خیبر پختونخوا دے معاون خصوصی اطلاعات و اعلی تعلیم کامران بنگش سنوفیسٹول دی افتتاحی تقریب دے بعد میڈیا نال ڳالھ مہاڑ آکھیے جو صوبے اچ سیاحت دے ودھارے کیتے نویں سیاحتی جہیں کوں ودھارا ݙتا ویندا پئے ݙو مہینے دے دوران 7 لکھ توں ودھ سیاحواں گلیات دا دورہ کیتے ،سرمائی سیاحت دے ودھارے نال پوری دنیا اچ خیبرپختونخوا دا مثبت امیج سامݨے آئے ،سنوفیسٹول دے انعقاد توں جتھاں سیاحتی شعبے کوں تھیسی ۔ روزگاردے نویں موقع وی پیداتھیسن ،صوبائی حکومت سیاحت کوں ودھارا ݙیوݨ کیتے صوبہ اچ نویں سیاحتی جہیں کوں ترقی ݙیندے پئن جیں توں صوبے اچ سیاحت کوں مزید ترقی حاصل تھیسی ۔ انہاں آکھیے جو ایں حوالے نال وزیراعظم عمران خان دے وژن تے من وعن عمل تھیندا پئے جیں توں عام بندے کوں روزگاردے موقع مل ویسن ۔
خیبرپختونخوا کلچراینڈ ٹورازم اتھارٹی، ضلعی انتظامیہ چترال لوئر اتے ہندوکش سنو سپورٹس کلب دے سانجھے اشتراک توں چترال دیاں سوہݨیاں وادیاں مداقلشت اچ وی ہندوکش سنو سپورٹس فیسٹیول 29 توں 31جنوری تئیں منعقد تھیا جیں اچ سکینگ، سنو بورڈنگ، آئس سکیٹنگ، آئس ہاکی، سنو ٹریکنگ، برف دی مجسمہ سازی سودھے باربی کیو نائٹ اتے محفل موسیقی دا اہتمام کیتا ڳیا فیسٹیول اچ 10غیرملکی کھلاڑیاں وٹرینرز سودھے 500توں ودھ سکینگ کھلاڑیاں شرکت کیتی۔فیسٹیول اچ سیاحواں دی وݙی تعداد شرکت کیتی تے پاکستان دے دلکش سیاحتی جہیں دی تعریف کیتی۔
سیاحتی حلقیں آکھیے جو اڄوکے سالاں اچ سنوفیسٹولز دے انعقاد توں سرمائی سیاحت کوں ودھارا تھیندا پئے اتے ہزاراں دی تعداد اچ اندرلے تے ٻاہرلے ملک توں سیاح ان فیسٹول داحصہ بݨدے پئن جیں توں شدید پالے تے برف باری دے باوجود مقامی لوکاں تے تاجراں کوں کاروبار کرݨ دے موقع ملدے پئن تے پاکستان دے دلکش اتے دل کوں بھاوݨ آلے قدرتی مناظر کوں پوری دنیا اچ متعارف کرویندے ہوئیں سیاحت دے ودھارے دے نال نال معیشت کوں وی تقویت مل ویسی
