اسلام آباد۔2فروری (اے پی پی):وفاقی وزیر اطلاعات شبلی فراز آکھیے جو حکومت دی زمین تے اثاثیں دی حفاظت اساݙا آئینی ، اخلاقی تے جمہوری فرض بݨدے اتے سرکاری یا سیاسی سرپرستی اچ غیر قانونی قبضے دے خلاف سخت کاروائی کیتی ویسی ۔اسلام آباد اچ کابینہ اجلاس توں بعد میڈیا بریفنگ ݙیندے ہوئیں شبلی فراز آکھیے جو اسلام آباد اچ کل گاݙی دے حادثے اچ چار نینگراں دی ہلاکت دے واقعے دا وزیراعظم سخت نوٹس ڳھدے، انہاں آکھیے جو اجلاس اچ قبضہ مافیا دے خلاف جاری مہم تے وی ڳالھ تھئی اے ، سرکاری زمیناں خاص طور تے ریلوے دی زمین تے لوک ٻہوں سوکھیں قبضے کرڳھندن اتے اتھاں مختلف سرگرمیاں شروع کرݙیندن ، انہاں آکھیے وزیر ریلوے اعظم خان سواتی کوں تلیقن کیتی ڳی اے جو ایں معاملے اچ ٻہوں سختی نال نبݨیا ونڄے ۔انہاں آکھیے جو لوک زمیناں تے قبضے کریندن تاں قانون دی حکمرانی کوں دھچکا لڳدے تے لوک خصوصا ٻاہرلے ملک رہݨ آلیں اچ عدم تحفظ دا احساس جنم گھندے اتے اساکوں ایجھے اقدامات کرݨے ہن جو لوک آپ دیاں زمیناں بارے بے فکر تھیون ،انہاں آکھیے جو کوئی وی غیر قانونی قبضہ جیڑھا جو سرکاری یا سیاسی لوکاں دی سرپرستی اچ تھیسی تاں ایندے تے سخت کاروائی کیتی ویسی ، انہاں آکھیے جتھاں نواں پاکستان ہاؤسنگ دا تعلق اے تاں اے کائنی جو حکومت اے گھر بݨیسی ، حکومت دا کم اے جو لوکاں کیتے سہولت کار بݨے جیڑھے گھر گھن نی سڳدے یا انہاں اچ معاشی سکت کائنی ،انہاں آکھیے جو اساں روٹی کپڑا تے مکان دے نعرے کوں عملی جامہ پوائے، وزیراعظم گزریل 18 مہینے توں ہفتہ وار میٹنگ کریندن تے حکومت ایجھا نظام بݨائے جو جیں اچ مکان کیتے این او سی ،نقشے پاس کرݨ دا عمل تھوڑے ویلھے اچ کرݙتا ویسی تے 30 ݙینھ توں ترائے مہینے اچ جاری کرݙتے ویسن ،وفاقی وزیر آکھیے جو بینک گھراں کیتے کہیں کوں قرضے نہ ݙیندے ہن لیکن حکومت اسٹیٹ بنک دی وساطت نال ٻئے بینکاں کوں راضی کیتے تے بینک جتنے وی قرضے ݙیندن ایندے اچوں پنج فیصد 378 ارب روپے ایں گھٹ لاگت دے گھراں دے منصوبیں کیتے مختص کریسوں ،انہاں آکھیے جو گھٹ لاگت دے گھراں کیتے شرح سود وی گھٹ اے .
