کوٹلی۔5فروری (اے پی پی):وزیر اعظم عمران خان بھارتی وزیر اعظم نریندرامودی کوں ہک واری ول مذاکرات نال کشمیر دے جھڑے کوں حل کرݨ دی دعوت ݙیندے ہوئیں آکھیے جو اقوام متحدہ دیاں قرارداداں دے مطابق کشمیریاں کوں حق خودارادیت ݙتا ونڄے ، ایندے بعد او خودمختار رہݨ چاہن یا پاکستان نال الحاق کرݨ چاہن اساکوں انہاں دا فیصلہ قبول ہوسی ،مذاکرات دی دعوت کوں اساݙی کمزوری نہ سمجھیا ونڄے ،اللہ دی غلامی کرݨ آلے کہیں دے سامݨے نی جھکدے ،سارا پاکستان کشمیریاں دی جدوجہد اچ انہاں دے رلے کھڑے ،ہر قسم دی سوچ اتے نظریہ آلیں نال ڳالھ تھی سڳدی اے لیکن چوراں اتے ڈاکوواں کوں این آر اوکائناں ݙیساں بھاویں او پٹھے تھیون ۔جمعے کوں کوٹلی آزاد کشمیر اچ یکجہتی کشمیر دے موقع تے خطاب کریندے ہوئیں آکھیے جو میݙا اتھاں آوݨ دا مقصد دنیا کوں اے سنھیا ݙیوݨ ہئی جو دنیا 1948 اچ اقوام متحدہ دیاں قرارداداں دے مطابق اپݨے مستقبل دا فیصلہ کرݨدا حق ݙتا ہئی ۔ دنیا کوں یاد کراوݨ آیاں جو او کشمیریاں کوں اقوام متحدہ دیاں قرارداداں دے مطابق حق خودارادیت ݙیوے اقوام متحدہ مشرقی تیمور جتھاں عیسائی اکثریت اچ ہن انہاں کوں وختی ریفرنڈم دے ذریعے آزادی ݙتی۔ اقوام متحدہ کوں اے یاد کراوݨ چاہنداں جو جنرل اسمبلی اچ وی یادہانی کرائی اتے ہمیشہ انہاں کوں یاد ݙویساں تے انہاں کشمیر دے حوالے نال اپݨا وعدہ پورا نی کیتا۔ وزیراعظم آکھیے جو کشمیریاں کوں اے پیغام اے جݙاں وی انہاں کوں حق خودارادیت ملسی او آپݨے مستقبل دا فیصلہ کریسن تاں پاکستان دے حق اچ فیصلہ کریسن ۔پاکستان انہاں کوں پورا حق ݙیسی او آزاد رہݨ چاہندن یا پاکستان دا حصہ بݨݨ چاہندن ۔ وزیراعظم آکھیے جواو اتھاں مقبوضہ کشمیر دے عوام کوں اے پیغام ݙیوݨ آئن جو اڄ سارا پاکستان انہاں دے رلے کھڑے ۔
