مسلم ليگ (ن) جي قيادت ۽ اڳواڻن ظرف سان سياسي انتقام جو مقابلو ڪيو، پي ٽي آءِ وارن جي يادداشت تمام گهڻي ڪمزور آهي: عطاءُ الله تارڙ

اسلام آباد– 17 – ڊسمبر (اي پي پي) اطلاعات، نشريات، قومي ورثي ۽ ثقافت واري وفاقي وزير عطاءُ الله تارڙ چيو آهي ته مسلم ليگ (ن) جي قيادت ۽ اڳواڻن ظرف سان سياسي انتقام جو مقابلو ڪيو، پي ٽي آءِ وارن جي يادداشت تمام گهڻي ڪمزور آهي، انهن ڌرڻي ۽ احتجاج جي ذريعي ملڪ ۾ عدم استحڪام جون ڪيتريون ئي ڪوششون ڪيون، ڪنٽينر تي بيهي بدتهذيبي، تشدد، احتجاج ۽ انتشار انهن جي تاريخ آهي، اسلام آباد ۾ ناڪام احتجاج کانپوءِ تحريڪ انصاف ڪوڙ ۽ پروپئگنڊه جو سهارو ورتو، حڪومت ٺوس پاليسين جي ڪري ملڪ ترقي ۽ استحڪام جي راهه تي گامزن آهي، دير ناهي ٿي، ملڪي ترقي ۽ خوشحالي جي لاءِ گڏجي اڳتي وڌڻو آهي. قومي اسيمبلي ۾ ڳالهائيندي اطلاعات واري وفاقي وزير چيو ته پي ٽي آءِ اڳواڻ شير افضل مروت ڀائيچاري ۽ ڳالهه ٻولهه جي حوالي سان مثبت خيالن جو اظهار ڪيو آهي، هي ايوان جمهوري روايتن سميت ٻڌي، ڀائيچاري ۽ تحمل جو پڻ امين آهي. هن چيو ته اسان ڪڏهن به وضع داري تي ٺاهه ناهي ڪيو، اسان پرتشدد سياست تي يقين نٿا رکون. ڪڏهن ڪنهن کي اهو ناهي چيو ته هي دشمن آهي، ان جي خوشي غمي ۾ شريڪ ناهي ٿيڻو. باني چيئرمين پي ٽي آءِ 2013ع جي اليڪشن ۾ لفٽر تان ڪري پيو ته ان وقت اسان جي چونڊ مهم هلي رهي هئي، باني چيئرمين پي ٽي آءِ اسان جو سياسي مخالف هو، اسان کي ان سان سئو اختلاف هئا پر محمد نواز شريف پارٽي اجلاس گهرايو ۽ پنهنجي سمورن ساٿين کي گهرائي پنهنجي چونڊ مُهم معطل ڪرڻ جو اعلان ڪيو، پارٽي جي پوري سينيئر قيادت نواز شريف، شهباز شريف، راڻا ثناءُ الله، خواجه آصف ۽ خواجه سعد رفيق شوڪت خانم اسپتال ويا، باني چيئرمين پي ٽي آءِ جي تيمارداري ڪئي، ان جي ڊاڪٽر سان مليا ۽ هڪ خيرسگالي جو پيغام ڏنو ته اسان جي توهان سان سياسي مخالفت آهي، ذاتي دشمني نه آهي. اطلاعات واري وفاقي وزير چيو ته مخالف سان مخالفت ڪرڻ جو مزو تڏهن اچي ٿو جڏهن هو ميدان ۾ بيهي. هن چيو ته اليڪشن ختم ٿيڻ کانپوءِ نواز شريف ٻاهرئين ملڪ يا پنهنجي تڪ ۾ نه ويو پر هو سڀ کان پهرين بني گالا ويو ۽ باني چيئرمين پي ٽي آءِ طرف دوستي جو هٿ وڌايو ۽ چيو ته اسان چاهيون ٿا ته هن ملڪ جي معاشي بهتري ۾ پنهنجو ڪردار ادا ڪريون، هن ملڪ جي عام ماڻهو جو مسئلو غربت، مهانگائي آهي، ان کي حل ڪرڻ اسان جو فرض آهي، اچو هن ملڪ جي مفاد ۽ عوام جي خاطر گڏجي اڳتي هلون پر تحريڪ انصاف اسان جي ان ڪوشش ۽ دانشمندي کي اسان جي ڪمزوري سمجهيو. هن اهو بيانيو ٺاهيو ته اهي اسان جا مخالف آهن، انهن جي خوشي غمي ۾ شرڪت ناهي ڪرڻي، هي ماڻهو ڪنٽينر تان صدا لڳائيندا هئا ته اچو حملو ڪريو، انهن وٽ چور ڦورو جي رِٽ هئي ڇا ان زبان ۾ جواب نه پئي ڏئي سگهياسين؟ اسان کي اسان جي قائد نواز شريف جهليو هو ته اهي ڪنٽينر تان جيڪو مرضي چون، اسان کي جواب ناهي ڏيڻو. اسان کي خصوصي طور تي منع ڪيو ويو ته لاس اينجلس ڪورٽ جي ججمنٽ جو حوالو ڪنهن ٽاڪ شو ۾ ناهي ڏيڻو، نواز شريف اسان کي اخلاق جي دائري ۾ رهي تنقيد ڪرڻ جي تلقين ڪئي پر ڪنٽينر جي مٿان روزانو گارگند جي سياست ڪئي ويندي هئي. هن چيو ته اسان چارٽر آف ڊيموڪريسي ڪيو، تلخين کي به وساري ڇڏيو پر اسان ڪڏهن به اهو ماحول نه ڏٺو هو ته چور ڌاڙيل، غدار قرار ڏنو وڃي، ايوان ۾ تقرير ٿيندي هئي ۽ ايوان ۾ ئي تنقيد ٿيندي هئي، سياسي مظاهرا ۽ جلسا ٿيندا هئا، ميان نواز شريف هن ملڪ ۾ ٽرين مارچ به ڪيو، وڏا وڏا جلسا به ڪيا پر ڪڏهن ڪنهن کي ”تون“ ڪري نه سڏيو، باني چيئرمين پي ٽي آءِ کي به خان صاحب چوندو هو. اطلاعات واري وفاقي وزير عطاءُ الله تارڙ چيو ته تحريڪ انصاف جا اڳواڻ گولين جي ڳالهه ڪن ٿا، ڇا توهان ساهيوال جي انهن ٻارن سان وڃي تعزيت ڪئي جن جي ماءُ پيءُ کي ڏينهن ڏٺي انهن جي اکين آڏو قتل ڪيو ويو؟ باني چيئرمين پي ٽي آءِ جي خطاب دوران ملتان جي قاسم باغ جلسي ۾ ڀاڄ پوڻ سان تحريڪ انصاف جا 8 کان 10 ڪارڪن فوت ٿي ويا هئا، ماڻهن اتي رڙيُون ڪيُون ته ماڻهو مري ويا آهن پر باني چيئرمين پي ٽي آءِ تقرير ڪندو رهيو، ڇا انهن ماڻهن جي گهر وڃي توهان تعزيت ڪئي؟ انهن کي ڪو پيغام ڏنو ته توهان جي موت اسان جي ڪري ۽ اسان جي جلسي ۾ ٿي آهي؟ اهڙا ڪيترائي واقعا آهن جيڪي توهان جي دور ۾ ٿيا، انهن کي بيان ڪرڻ شروع ڪري ڇڏيون ته رات ٿي وڃي واقعا ختم نه ٿيندا. وفاقي وزير عطاءُ الله تارڙ چيو ته ڇا فوتگين جو ڪوڙو بيانيو اسان ٺاهيو هو؟ ڇا سوشل ميڊيا تي عليمه خان بئريسٽر سان گلا نه ڪئي ته توهان 12 فوتگيون ڇو چيون؟ ڪو 1200 چئي رهيو آهي ڪو 1600 چئي رهيو آهي، ڪو آرٽيفيشل انٽيلي جنس جي استعمال سان اسلام آباد جي پوري رستي کي رت ۾ رڱيل ڏيکاري رهيو آهي، جيڪڏهن توهان سچا هئا ته توهان جا اڳواڻ مختلف انگ اکر ڇو ڏيندا رهيا؟ جيڪڏهن توهان سچا هئا ته پوري پارٽي هڪ ڳالهه ڪري ها، اهو ناهي ٿيندو ته توهان جا ماڻهو هتان هتان جون ڳالهيون چون. هن چيو ته مائرن، ڀينرن، ڌيئرن کي سياسي انتقام جو نشانو بڻائڻ جي روايت پڻ باني چيئرمين پي ٽي آءِ وڌي، راڻا ثناءُ الله جڏهن جيل ۾ هو، هن نه ڪڏهن ڪا گهرج ڪئي ۽ ڪا ڊيمانڊ رکي، سندس دوا تائين جيل ۾ پهچائڻ کان منع ڪيو ويو، مريم نواز کي والد آڏو گرفتار ڪرڻ جو مقصد ڪهڙو هو؟ جهانگير ترين جي ٻارڙين تي ڪيس ڪنهن ڪيا؟ عليم خان جي گهرواريءَ کي ڏيڍ ڪلاڪ ويٽنگ روم ۾ ويهاريو ويو، اسان سان توهان جيڪو ڪيو سو ڪيو پر توهان پنهنجي ماڻهن کي به نه بخشيو، عثمان بزدار جو والد سردار فتح محمد بزدار اسان جي پارٽي ۾ به رهيو آهي، توهان ان جي ڪري پوري پنجاب جي شڪل بگاڙي ڇڏي، ڪنهن تي هيروئن وڌي، ڪنهن جي ٻارڙي تي ڪيس ڪيو، ڪنهن جي گهر اينٽي ڪرپشن جي ريڊ ڪرائي. وفاقي وزير چيو ته اسان جي وڏن بزرگن پاڪستان ٺاهڻ ۾ ڪردار ادا ڪيو آهي، اسان جي رت ۾ پاڪستانيت آهي، اسان کي ڪيڏانهن ناهي وڃڻو، شهزاد اڪبر يا شهباز گل ڪڏهن هتي ويهندا هئا، توهان کي غلط مشورا ڏيندا هئا، اسان توهان کي ان وقت به چوندا هئاسين ته توهان هتي ويٺا هوندا ۽ هي ڀڄي ويندا. وفاقي وزير چيو ته انهن جي سياست ۾ تڪبر ۽ غرور هو، انهن جي دور ۾ مخالف ڌر جي پوري فرنٽ لائين خالي هئي، هڪ وقت اهڙو آيو جو سڀ جيلن جي اندر هئا. اطلاعات ۽ نشريات واري وفاقي وزير چيو ته اسان وٽ نه ته شهزاد اڪبر جي سيٽ تي ڪو احتساب بابت صلاحڪار آهي نه وزيراعظم هائوس مان ڪا هدايت جاري ٿئي ٿي، ايف آءِ اي ۽ نيب قاعدن ۽ ضابطن موجب پنهنجي ڪارروائي ڪري رهيا آهن. هن چيو ته اسان جو فوڪس معيشت تي آهي، اڄ وياج جي شرح 13 سيڪڙو تي اچي وئي آهي، مهانگائي 4 سيڪڙو تي آهي، مٽاسٽا جو ناڻو 8.8 ارب ڊالر ٿي ويو آهي، پرڏيهي ناڻي جا ذخيرا 12 ارب ڊالر تائين پهچي ويا آهن، معيشت صحيح ٽريڪ تي هلي رهي آهي. هن چيو ته تحريڪ انصاف ڪوڙو بيانيو ٺاهيو، حقيقتون مسخ ڪيون. هن چيو ته وڪيل تحريڪ ۾ اسان قربانيون ڏنيون، رستن تي هڪ سال تائين جدوجهد ڪئي، اسان چاهيو ٿي ته ملڪ جو نظام بهتر ٿئي. هن چيو ته تحريڪ انصاف وٽ جيئن ئي اقتدار آيو انهن اکيون ڦيري ڇڏيون، پنهنجي سياسي مخالفن کي سياسي انتقام جو نشانو بڻايو، هي اسان کي ڪمزور سمجهندا رهيا، اسان پوءِ به تحمل ۽ برداشت سان سياست ڪئي، اهو نه وساريو توهان جو ماضي ڇا آهي ۽ اسان جو ڇا آهي، شير افضل مروت سٺي ڳالهه ڪئي آهي، ماحول کي بهتري طرف وٺي وڃون. اڃا به وقت آهي، هوش کان ڪم وٺن، گڏجي ويهي ملڪ جي بهتري جي لاءِ ڪم ڪريون، اڃا به دير ناهي ٿي، اقتصادي ترقي جي سفر ۾ پنهنجو حصو وجهن، توهان به ايترائي پاڪستاني آهيو جيترا اسان آهيون، جيڪڏهن توهان ڪوڙو بيانيو کڻي هلندا ۽ ان کي انتقام جي سياست جي نظر سان ڏسندا ته پوءِ اڳتي نه ٿو وڌي سگهجي.