اسلام آباد۔7اکتوبر (اے پی پی):بلوچستان دے ضلع ہرنائی اچ 5.9 درجے شدت دے زلزلے دے نتیجے اچ 20 بندے جاں بحق اتے 300 توں ودھ زخمی تھی ڳئن ، زلزلے دے جھٹکے صوبائی دارالحکومت کوئٹہ دے علاوہ سبی، ہرنائی، پشین، قلعہ سیف اﷲ ، چمن، زیارت اتے ژوب سمیت کئی علاقیں اچ محسوس کیتے ڳئن ۔پروو نشل ڈیزاسٹر میجنمنٹ اتھارٹی (پی ڈی ایم اے) بلوچستان موجب ٻدھ تے خمیس دی وچلی رات 3 وڄ تے 2 منٹ تے آوݨ آلے زلزلے پاروں مکاناں دے ملبے تلے دب تے 20 بندے جاں بحق اتے 300 توں ودھ زخمی تھئن ۔ ریسکیو ذرائع موجب ہرنائی اچ 70 توں ودھ مکاناں کوں ضیان پڄݨ دی اطلاع اے جݙاں جو زلزلے توں ودھ جانی و مالی ضیان ضلع ہرنائی اچ تھئے ، زلزلےتوں ڈھݨ آلیاں عمارتاں دے ملبے تلوں دبیے لوکاں کوں کڈھݨ کیتے ریسکیو آپریشن جاری اے ۔صوبائی وزیر داخلہ میر ضیاءاﷲ لانگوو میڈیا کوں ݙسائے جو زلزلے توں متاثرہ صوبے دے سارے ضلعیں اچ ایمرجنسی نافذ کرݙتی ڳئی اے تاں جو امدادی سرگرمیاں تے صحت دی خدمات دی مدد کیتی ونڄ سڳے ۔ وزیر مزید آکھیے جو متاثرہ علاقیں اچ ہیلی کاپٹر بھیجے ویندے پئن تاں جو شدید زخمیاں کوں صوبائی دارالحکومت کوئٹہ سودھے ٻئے شہراں اچ منتقل کیتا ونڄ سڳے ۔ پاکستان دے نیشنل سیسمک مانیٹرنگ سینٹر دے مطابق زلزلے دی شدت ریکٹر سکیل تے 5.9 ریکارڈ کیتی ڳئی اے جیں دا مرکز کوئٹہ توں 102 کلومیٹر مشرق دے پاسے ہرنائی دے نیڑے تے سطح زمین توں 15 کلو میٹرجھکا ہئی ۔پی ڈی ایم اے بلوچستان دے ڈائریکٹر جنرل نصیر آکھیے جو امدادی ٹیماں متاثرہ علاقیں اچ پڄ ڳئن تے امدادی کم شروع کرݙتے ۔ انہاں مزید آکھیے جو ضلع دے پہاڑی علاقیں تے بجلی دی فراہمی منقطع تھیوݨ پاروں امدادی کماں اچ اوکھ دا سامݨا اے ، زلزلے توں متاثرہ کجھ علاقیں اچ لینڈ سلائیڈنگ دی وجہ توں کئی سڑکاں بند تھی ڳئن جیں توں امدادی کم متاثر تھیندا پئے ۔
بلوچستان اچ 5.9 درجے شدت دا زلزلہ، 20 بندے جاں بحق، 300 زخمی، درجناں مکان ڈھہہ ڳئن ، امدادی کارروائیاں جاری
مضمون کا ماخذ : اٹلانٹس کا بادشاہ
متعلقہ مضامین
